Муовини ёвари Вазири умури хориҷии Амрико дар умури Осиёи Миёна ва Осиёи Ҷанубӣ дар як гуфтугӯи онлайнӣ ҷузъиёти ҷаласаи навбатии гуруҳи мавсум ба С5+1-ро шарҳ дод. Ҷонатан Ҳеник гуфт, Майк Помпео бо вазирони корҳои хориҷаи панҷ кишвари Осиёи Марказӣ дар мавзӯи мубориза бо COVID-19, рушди иқтисод ва савдо ва амнияти минтақавӣ суҳбат кардаанд.

Ҷаласаи навбатии вазирони корҳои хориҷии Амрико ва панҷ кишвари Осиёи Марказӣ (С5+1) рӯзи 30-юми июн онлайнӣ баргузор шуд. Дар вохӯрӣ вазирони корҳои хориҷии ИМА - Майк Помпео, Қазоқистон - Мухтор Тлеуберд, Тоҷикистон - Сироҷиддин Муҳриддин, Қирғизистон - Чингиз Айдарбеков, Узбекистон - Абдулазиз Комилов ва Туркманистон - Рашид Мередов иштирок карданд.

Ҷаласаи рӯзи 30-юми июн нахустин гуфтугӯи оқои Помпео ва вазирони умури хориҷии кишварҳои Осиёи Миёна дар қолаби С5+1 пас аз мулоқоти моҳи феврали онҳо дар Тошканд буд.

Ҷонатан Ҳеник, муовини ёвари вазири умури хориҷии Амрико дар як гуфтугӯи онлайнӣ рӯзи 1-уми июл гуфт, оқои Помпео ба пуштибонии Амрико аз истиқлол, ҳокимият ва тамомияти арзии кишварҳои ОМ таъкид карда ва гуфтааст, ки ин асоси стратегияи кишвараш дар ин минтақа мебошад. Ба гуфтаи ин дипломати амрикоӣ, Майк Помпео ҳамвора таъкид кардааст, ки Амрико ба субот, пешрафт ва амнияти Осиёи Миёна алоқа дорад.

Ӯ гуфт, сиёсати кишвараш ин будааст, ки итминон ҳосил шавад, ки кишварҳои Осиёи Марказӣ ва дар интихоби манфиатҳои миллии худ озод ҳастанд ва дар тиҷорат, рушд ва муваффақият вобастаи ҳеҷ кишваре набошанд.

"Мо барои Осиёи Марказии пешрафта ва ниҳоят амн, ки ин кишварҳо, Амрико ва ҷомеаи ҷаҳонӣ фоида барад, кор мекунем,"-гуфт Ҷонатан Ҳеник.

Ба гуфтаи оқои Ҳеник, яке аз мавзуъҳои меҳварии гуфтугӯи рӯзи сешанбе, пандемияи COVID-19 ва таъсири он ба иқтисоди ҷаҳонӣ ва минтақаи Осиёи Марказӣ буд. Амрико то ба ҳол барои кишварҳои шарики худ дар минтақа барои пешгирӣ ва назорати ин беморӣ 25 миллион доллар кӯмак кардааст.

Ба иловаи ин, ба унвони саҳмдори пештоз дар ҷаҳон -- дар Сандуқи байналмилалии пул, Бонки Ҷаҳонӣ, Бонки Осиёии Рушд ва Бонки аврупоии таҷдид ва рушд, Амрико нақши муҳиме дар таҳияи наздик ба 3 миллиард доллар дар кумаки вокунишии COVID-19 ба кишварҳои Осиёи Миёна доштааст.

Масъалаи дигари меҳварии гуфтугӯи Помпео бо ҳамтоёнаш аз Осиёи Марказӣ тақвият ва устувории иқтисодӣ будааст.

Ба гуфтаи Ҷонатан Ҳеник, кишварҳои Осиёи Марказӣ бояд ба дунболи ислоҳоти сохторӣ ва дарозмуддат бошанд, ки битавонад суботи сиёсии пойдор, дарозмуддат ва рушди иқтисодиро барои мардум тазмин кунад.

Дар музокироти вазирони умури хориҷии Амрико ва Осиёи Марказӣ субот дар минтақа ба шумули раванди сулҳ дар Афғонистон баҳс шудааст.

"Иёлоти Муттаҳидаи Амрико ба ин бовар аст, ки як Афғонистон босубот ва аз ҷиҳати иқтисодӣ пешрафта барои сулҳ ва амнияти минтақаи Осиёи Марказӣ бисёр муҳим аст",-гуфт ӯ. "Мо аз ҳамкорӣ ва кӯмакҳои шарикони худ дар С5+1 қадрдонӣ мекунем ва бо ин ҳадафи муштарак талош мекунем",-афзуд вай.

Вохӯрии гуруҳи мавсум ба "С5+1" аз соли 2015 баргузор мешавад. Аз он сол Иёлоти Муттаҳидаи Амрико ва панҷ кишвари Осиёи Марказӣ дар ҳошияи нишасти Маҷмаи умумии Созмони Милали Муттаҳид чаҳорчӯбаи нави ҳамкориро барои баррасии масъалаҳои минтақавӣ муқаррар кардаанд.

Владимир Путин, раиси ҷумҳури Русия моҳи октябри имсол бо сафари давлатӣ ба Тоҷикистон меояд. Ин маълумот дар барномаи кории ҳукумати Тоҷикистон барои нимаи дуюми соли 2025 нашр шудааст. Радиои Озодӣ 20-уми июл бо ин санад шинос шуд.

Ҷузъиёти бештари сафари Путин ба Душанбе маълум нест. Мақомоти Тоҷикистону Русия дар бораи сафар расман чизе нагуфтаанд.

Дар барномаи кории ҳукумати Тоҷикистон омадааст, дар моҳи октябр ва баробар бо сафари Владимир Путин, дар Душанбе нишасти Шӯрои сарони кишварҳои ИДМ ва вохӯрии роҳбарони кишварҳои Осиёи Марказӣ+Русия баргузор мешаванд. Зоҳиран яке аз ҳадафҳои сафари Путин ба Душанбе, ширкат дар ин ҳамоишҳо аст.

Владимир Путин бори ахир соли 2022 ба Тоҷикистон сафар карда буд. Ин аввалин сафари Путин баъди ҳамлаи артиши Русия ба хоки Украина ба ҳисоб мерафт. Дар ҷараёни сафари ахири Путин ба Душанбе ягон санад имзо нашуда буд.

Ба гуфтаи шоҳидон ва масъулони бемористон, неруҳои Исроил рӯзи 19-уми июл бори дигар ба сӯи гуруҳе аз фаластиниҳо, ки барои дарёфти ғизо мерафтанд, оташ кушодаанд. Ба гузориши расонаҳои хабарӣ, дар пайи ин ҳодиса беш аз 30 нафар кушта шудаанд.

Хабаргузории "Ассошиэйтед пресс" хабар дод, ки тирандозӣ дар наздикии маркази "Бунёди башардӯстонаи Ғазза" (GHF) рух дод.

Ин бунёд моҳи феврали имсол бо пешниҳоди Амрико ва Исроил ба кор оғоз кард. Ҳадаф аз ташкили онҳ, тағйир додани низоми тақсими ёриҳои башардӯстона дар Ғазза аст. Пештар Исроил иддао карда буд, гуруҳи "Ҳамос" кумакҳои башардӯстонаро ба нафъи худ истифода мебарад. Амрико ва Иттиҳоди Аврупо "Ҳамос"-ро гуруҳи террористӣ медонанд.

Созмони Милал аз фаъолияти "Бунёди башардӯстонаи Ғазза" сахт интиқод карда гуфтааст, ин бунёд дар кораш усули башардӯстонаро риоят намекунад. Аммо бунёд чунин танқидҳоро рад карда гуфтааст, то кунун миллионҳо бастаи ғизоро байни мардуми гуруснаи Ғазза тақсим кардааст.

Хабаргузории "Ассошиэйтед пресс" гузориш додааст, ки артиши Исроил дар макони тақсими кумакҳо ҳузур надорад, танҳо аз дур амниятро барқарор мекунад.

Ин бори аввал нест, ки сокинони Навори Ғазза дар вақти навбатпойӣ барои гирифтани ғизо кушта мешаванд. Ҳафти гузашта низ 20 нафар дар яке аз марказҳои тақсими ғизои "Бунёди башардӯстонаи Ғазза" кушта шудаанд.

Рӯзи 13-уми июл бар асари бархӯрди мушаки артиши Исроил ба нуқтаи тақсими об дар урдугоҳи гурезаҳои Нусейрат дар Ғазза, дастикам 8 нафар кушта ва 17 нафар захмӣ шуда буд.

Артиши Исроил гуфт, ки мушак ба сӯи як ҷангҷӯи гуруҳи "Ҷиҳоди исломӣ" партоб шуда буд, аммо "ба далели корношоямӣ" мушак чанд метр дуртар афтид.

Кумитаи ҳолатҳои фавқулодаи Тоҷикистон хабар додааст, ки як занро аз ғарқшавӣ наҷот додаанд.

Ориф Нозимиён, сухангӯи Кумита дар хабарномае навиштааст, Абдурасулова Б. сокини 28-солаи ноҳияи Хуросон ва модари 5 фарзанд, шоми 19-уми июл худро аз болои пул ба дарёи Вахш партофт. Сабаби даст ба ин кор задани зан маълум нест.

Сухангӯи Кумитаи ҳолатҳои фавқулода мегӯяд, наҷотдиҳандагон занро 500-600 метр поёнтар аз ҷойи партофташуда зинда аз об бароварданд. Занро дар Бемористони ноҳияи Кушониён бистарӣ кардаанд ва аҳволи ӯ хуб гуфта мешавад.

Мақомот нагуфтаанд, ки ин зан барои чӣ худро ба дарё партофт.

Ин бори аввал нест, ки занону духтарон дар Тоҷикистон қасди ҷонашон мекунанд.

Намунаи ахираш, фоҷиа дар ноҳияи Фархор мебошад, ки шаби 29 ба 30-юми июн рух дод. Ба гуфтаи мақомот, дар ин шаб Мадина Ҳалимоваи 27-сола худро бо чор фарзанди ноболиғаш ба об партофт. Худи Мадина аз об зинда берун омад, аммо кӯдаконаш ғарқ шуданд. Ҷасади се кӯдаки Мадина Ҳалимоваро аз об ёфтаанд. Додситонӣ ин занро боздошт карда, аз рӯи моддаи "куштор" нисбаташ парванда кушодаанд.

Украина ба Русия пешниҳод кардааст, ки ҳафтаи оянда бо ҳам музокира кунанд. Дар ин бора президенти Украина Владимир Зеленский хабар дод.

Ба гуфтаи Зеленский, пешниҳоди Киевро Рустам Умаров, котиби Шӯрои амният ба Русия расонд. Аммо Зеленский мушаххас нагуфт, ки Умаров кай ва дар куҷо бо намояндагони Русия вохӯрда, пешниҳоди музокира додааст.

Намояндагони Русия ва Украина то ин вақт ду маротиба дар шаҳри Истанбули Туркия гуфтугӯ кардаанд. Музокираи ахир моҳи июни имсол баргузор шуда буд. Натиҷаи ин ду даври музокирот табодули асирон ва ҷасади низомиёни кушташуда буд. Русия то ҳол ба пешниҳодҳо дар бораи оташбас мувофиқат накардааст.

Ба гуфтаи Владимир Зеленский, барои расидан ба оташбас, бояд гуфтугӯҳо бештар шаванд.

Хабаргузориҳои русии ТАСС ва "Интерфакс" аз қавли манобеашон гузориш додаанд, ки воқеан Маскав дар бораи гузарондани музокирот дар ҳафтаи оянда, аз Киев пешниҳод гирифтааст.

Доналд Трамп, раиси ҷумҳури Амрико пештар ба Русия ҳушдор дод, ки агар давоми 50 рӯз бо Украина ба тавофуқ нарасанд, алайҳи Маскав ва шарикони тиҷоратиаш таърифаҳои вазнин ҷорӣ мекунад.

Мақомоти тоҷик ба таври расмӣ ихроҷи муҳоҷирони афғонро аз Тоҷикистон тасдиқ карданд ва сабабҳои онро шарҳ доданд. Дар рӯзҳои ахир мавзӯи ихроҷи муҳоҷирони афғонистонӣ аз Тоҷикистон, дар расонаҳо сару садоеро ба миён оварда буд.

Маркази матбуоти Нерӯҳои марзбонии Кумитаи давлатии амнияти миллии Тоҷикистон рӯзи 19 июл бо нашри як изҳорот, ки хабаргузории давлатии "Ховар" онро нашр кард, гуфт, муҳоҷирати шаҳрвандони хориҷӣ ба Тоҷикистон афзоиш ёфтааст ва бархе аз онҳо "ғайриқонунӣ" вориди кишвар шудааанд ва шуморе аз онҳо "низоми муқарраргаштаи будубошро дағалона вайрон мекунанд".

Ба гуфтаи манбаъ, санҷишҳо маълум кардаанд, ки "ин афрод дар ташвиқу тарғиби ақидаҳои ҳаракатҳои экстремистӣ, пешниҳоди маълумот ва ҳуҷҷатҳои қалбакӣ барои соҳиб шудан ба мақоми гурезагӣ, вайрон кардани талаботи низоми муҳоҷират, доштани шаҳрвандии кишвари севум, истифода кардани қаламрави Тоҷикистон ҳамчун кишвари транзитӣ ва муомилаи ғайриқонунини маводи мухаддир", даст доштаанд.

Аммо Нерӯҳои марзбонӣ ҳеч далел ё омореро дар ин бора зикр накардааст.

Мақомоти тоҷик мегӯянд, ки берун кардани шумори муайяни шаҳрвандони Афғонистон аз қаламрави Тоҷикистон, дар ҳамин чорчӯба сурат мегирад.

Дар изҳороти мақомоти тоҷик гуфта нашудааст, ки чӣ миқдор аз паноҳандагони афғонистониро тайи рӯзҳои ахир ба кишварашон баргардондаанд.

Тасдиқ ва таъйиди гуфтаҳои мақомоти тоҷик аз манбаъҳои мустақил ғайри имкон аст.

Ҳафтаи гузашта чанд расонаи маҳаллии Афғонистон бо истинод ба манбаъҳои худ хабар доданд, ки гӯё мақомоти Тоҷикистон ба муҳоҷирони афғонистонӣ 15 рӯз муҳлат додаанд, то кишварро тарк кунанд.

Давоми ҳафтаи ҷорӣ дар расонаҳо наворҳое нашр шуд, ки эҳтимолан ба таври маҷбурӣ ба микроавтобусҳо бор кардани паноҳҷӯёни афғонистонии муқими Тоҷикистонро нишон медод.

Рӯзи 17 июл шуморе аз муҳоҷирони афғон дар шаҳри Ваҳдат ба Радиои Озодӣ гуфтанд, ки "се автобуси навъи "Газел" омада даҳҳо нафар, аз ҷумла занону кӯдакон ва мардонро" бурданд.

Ҳамсояҳои тоҷики онҳо ҳам тасдиқ карданд, ки шоҳиди бурда шудани шуморе аз муҳоҷирон буданд ва баъди ин бисёре аз паноҳҷӯёни дигар талош мекунанд дар хона ва ё ҷойҳои амни дигар паноҳ ёбанд ва берун набароянд, чун аз боздошту баргаштан ба Афғонистон ҳарос доранд.

Ин муҳоҷирони афғон мегӯянд, ки бо виза ва ба таври қонунӣ вориди қаламрави Тоҷикистон шудаанд ва дар ниҳодҳои кор бо паноҳандагон сабти ном ҳастанд.

Дар гузашта Комиссариати олии Созмони Милали Муттаҳид дар умури паноҳандагон борҳо аз мақомоти Тоҷикистон хоста буд, ки паноҳҷӯёни афғонистониро ихроҷ накунанд, зеро эҳтимол дорад дар кишварашон бо озору азият рӯбарӯ шаванд.

Бино ба иттилои расмӣ, дар Тоҷикистон 9 ҳазор шаҳрванди Афғонистон зиндагӣ мекунанд. Аксари онҳо мегӯянд, ки аз тарси "Толибон" ба Тоҷикистон фирор кардаанд.

Оҷонси авиатсияи мулкии Тоҷикистон аз оғози парвозҳои мустақими ширкати "Centrum Air" дар хатсайри Тошканд-Душанбе-Тошканд, хабар дод.

Ба иттилои ин ниҳод, аввалин парвози ҳавопаймои ин ширкат миёни пойтахтҳои Тоҷикистон ва Узбекистон рӯзи 19 июл сурат гирифт.

Дар ин хатсайр ширкатии тоҷикистонии "Сомон Эйр" ва "Uzbekistan Airways"-и Узбекистон ҳам парвозҳо анҷом медиҳанд.

Роҳандозии парвозҳои нав дар хатсайри Тошканд-Душанбе дар ҳоле аст, ки моҳи гузашта ҳукумати Тоҷикистон дар бахши ҳавонавардӣ сиёсати "Осмони боз"-ро эълон кард. Қарори ҳукумат 12-уми июн тасвиб шуд.

Бар асоси тартиби нав, Тоҷикистон низоми паритет ё баробарӣ дар парвозҳоро бекор мекунад. Қаблан парвозҳо ба Тоҷикистон ё аз инҷо ба дигар кишварҳо, миёни ширкатҳои ҳавопаймоии Тоҷикистон ва ширкатҳои давлати дигар баробар тақсим мешуд.

Бар асоси қарори ҳукумат, инчунин бисёр маҳдудиятҳо барои ширкатҳои ҳавопаймоии хориҷӣ бекор карда мешавад. Аз ҷумла, ҳамаи маҳдудиятҳо дар зичии парвозҳо ва ё шумораи ҷойҳои нишаст, шумораи таъинот дар хатсайр, маҳдудиятҳои тарифӣ барои интиқоли байналмилалии ҳавоӣ ва маҳдудиятҳо барои шумораи ширкатҳои ҳавопаймоӣ аз байн бурда мешаванд.

"Осмони боз" як таҷрубаи байналмилалӣ аст, ки назорати давлатро бар таъйини хатсайрҳо, нархи билети парвоз ва бисёр маҳдудиятҳо аз байн мебарад.

Масъалаи ҷорӣ кардани низоми "Осмони боз" дар Тоҷикистон ҳанӯз соли 2018 дар як ҷаласаи шӯрои машваратии беҳтар кардани фазои сармоягузорӣ бо ҳузури раисҷумҳур Эмомалӣ Раҳмон садо дода буд. Он замон президент ба Оҷонси ҳавонавардӣ супориш дода буд, ки барои амалӣ кардани ин сиёсат ва бештар кардани хатсайрҳои ҳавоӣ чораҳои зарурӣ андешад.

Бархе коршиносон қаблан ба Радиои Озодӣ гуфта буданд, инҳисорталабон ё монополистони бозори ҳавоӣ дар кишвар иҷозаи пурра амалӣ шудани низоми "Осмони боз"-ро шояд надиҳанд.

Ройс Ламберт, як додраси ноҳиявӣ дар Амрико дархости Радиои Аврупои Озод/Радиои Озодӣ барои содир кардани ҳукми ибтидоӣ дар парвандаи шикоятҳои ин ниҳод алайҳи Оҷонси байнулмилалии расонаҳои Амрико ё USAGM-ро, пазируфт.

Додрас дар ҳукми худ ба USAGM дастур дод, то пули боқимондаи соли молии 2025-ро, ки аз сӯи Конгресс барои Радиои Аврупои Озодӣ/Радиои Озодӣ ҷудо шудааст, сари вақт пардохт кунад.

Бар асоси ҳукми додрас Ройз Ламберт, шартгузории Оҷонси байнулмилалии расонаҳои Амрико ё USAGM ба Радиои Аврупои Озод/Радиои Озодӣ, ки ин маблағро танҳо дар сурати қабули шартҳои нав пардохт хоҳад кард, нақзи қонун мебошад.

Додрас навишт, "то онҷо, ки додгоҳ маълумот дорад, бесобиқа аст, ки як созмон дархост кунад шароити тамоман нав бар робитаи кории чанд даҳсолаи ин созмон бо як ниҳоди дарёфткунандаи кӯмаки молӣ ҳоким шавад ва сипас посухгӯиро мутаваққиф кунад, ба вижа вақте, ки ин созмон аз назари қонунӣ вазифадор аст будҷаи солонаи қабулшудаи Конгрессро ба ниҳоди хос, ки бо зикри ном мушаххас шудааст, пардохт кунад".

Додгоҳ изҳор дошт, ки "бетавҷҷуҳии ошкори USAGM ба "масъулиятҳои молии худ" боис шудааст, ки Радиои Аврупои Озод/Радиои Озодӣ маҷбур шавад шуморе аз кормандонашро ба рухсатии каммуз фиристад, барномаҳояшро лағв кунад ва ин ба нуфузи ҷаҳонии Радиои Аврупои Озод/Радиои Озодӣ, ки тӯли чандин даҳа ба даст оварда буд, латма бизанад".

Стивен Капус, президенти Радиои Аврупои Озод/Радиои Озод гуфт, "ҳукми имрӯзи додгоҳ авҷи талошҳои қонунии беист барои водор кардани USAGM ба пардохти буҷаи лозим барои анҷоми маъмурияти муҳими Радиои Аврупои Озод/ Радиои Озодӣ аст. Борҳо ва борҳо додгоҳ дар мавриди мавзуи асосии пардохти будҷаи ҷудошуда аз сӯи Конгресс, ба нафъи мо ҳукм содир кардааст".

Ӯ афзуд, "ин пирузӣ ба рузноманигорони мо ангезаи лозим медиҳад, то ҳар ҳафта ба ҳудуди 47 миллион нафаре, ки барои дарёфти ҳақиқат ва муқобила бо таблиғоти вайронгари ҳукуматҳои авторитарӣ ба рӯзноманигории мо такя мекунанд, дастрасӣ дошта бошанд. Акнун, беш аз ҳар вақти дигаре, набояд фазои хабариро ба ҳукуматҳои авторитарӣ вогузор кунем".

Рӯзи 14-уми март имсол, USAGM ҳудуди 75 миллион доллар буҷаи Радиои Аврупои Озод/Радиои Озодиро барои моҳҳои март-сентябри соли 2025 боздошт.

Ин кор пас як дастури президент Доналд Трамп анҷом шуд, ки фармон дода буд харҷи кори ҳафт идора, азҷумла USAGM мувофиқи қонунҳо коҳиш дода шавад.

Радиои Аврупои Озод/Радиои Озодӣ ин корро "ғайриқонунӣ" хонд ва алайҳи USAGM иқдоми қонунӣ кард.

Том Баррак, сафири Амрико дар Туркия эълон кард, ки Исроил ва Сурия бо оташбасе, ки Туркия, Урдун ва ҳамсоягон аз он пуштибонӣ мекунанд, мувофиқат карданд.

Том Баррак ки фиристодаи вижаи Амрико дар умури Сурия низ аст, бомдоди 19 июл дар шабакаи Х навишт, "нахуствазири Исроил ва раисҷумҳури Сурия бо ҳимояти вазири корҳои хориҷии Амрико бо оташбасе, ки мавриди истиқболи Туркия, Урдун ва ҳамсоягонаш қарор гирифт, мувофиқат карданд".

Сафири Амрико дар Туркия афзуд, "мо аз друзҳо, бодиянишинҳо ва сунниҳо мехоҳем, ки силоҳҳои худро ба замин бигузоранд ва ҳамроҳ бо ақалиятҳои дигари суриягӣ муттаҳид шаванд ва бо ҳамсоягони худ сулҳ барқарор кунанд".

Ҳануз ҷузъиёти бештаре дар ин бора эълон нашудааст ва мақомҳои исроилӣ ва суриягӣ низ вокуниши расмӣ нашр накардаанд.

Даври нави даргириҳо байни ақалияти друзҳо бо қабилаҳои бодиянишин дар шаҳри Сувайдо, дар ҷануби Сурия ҳафтаи гузашта оғоз шуд ва пас аз он неруҳои давлатии Сурия ба ин минтақа фиристода шуданд.

Исроил неруҳои давлатии Сурияро ба пуштибонӣ аз қабилаҳои суннӣ муттаҳам кард ва онҳоро ҳадаф қарор дод. Неруҳои суриягӣ рузи чаҳоршанбе бар асоси як созиш аз ин минтақа ақибнишинӣ карданд.

Исроил дар рузҳои ахир ҳамлаҳои худ ба ҷануби Исроилро афзоиш дод ва рузи 16 июл атрофи қасри президентӣ ва вазорати дифои Сурия дар Димишқро ҳадаф қарор дод.

Рузи 18 июл як мақоми исроилӣ эълон кард, ки кишвараш мувофиқат кардааст, ки ба неруҳои давлатии Сурия иҷозаи дастрасии маҳдуд ба минтақаи Сувайдо барои ду рузро бидиҳад, то ба даргириҳо поён диҳанд.

Ба иттилои созмони Дидбони ҳуқуқи башари Сурия, ки қароргоҳаш дар Лондон аст, дар даргириҳои ахир 600 нафар ҷон бохтанд, ки наздик ба 180 нафари онҳо нерӯҳои давлатӣ мебошанд.

Иттиҳоди Аврупо бастаи 18-уми таҳримҳои зидди Русияро дар робита бо ҷанги идомаёбанда дар Украина қабул кард. Ин навбат соҳаҳои нафту энержии Русия мавриди ҳадаф қарор гирифтаанд.

Урсула вон дер Лейен, раиси Комиссиюни Аврупо гуфт, “мо ба қалби мошини ҷангии Русия зарба задем. Соҳаҳои бонкдориву энержӣ, саноати ҳарбӣ ва ҳам бахши нархгузории нафтро ҳадаф қарор додем.

Фишор идома дорад ва то замоне пойбарҷо хоҳад буд, ки Путин ба ҷанг хотима набахшад”. Ҷузъиёти вобаста ба таъини нархи ҳадди аксари нафт маълум нест, вале Reuters дар нақли қавл аз чанд дипломат навишт, ки бастаи таҳримҳо нархи нафти фурӯшии Русияро то 47,6 доллар барои як бушка нигоҳ хоҳад дошт.

Таҳримҳо инчунин манъи додугирифтҳо тавассути лӯлаи гази “Маҷрои шимолӣ” ва таҳрими киштиҳои махфии флоти соягии Русияро дар бар мегиранд. Кая Каллас, раиси сиёсати хориҷии Иттиҳоди Аврупо гуфт, “Паём хеле рӯшан аст: Аврупо кӯмакашро ба Украина коҳиш намедиҳад.

Иттиҳоди Аврупо фишорро болои Русия то замоне, ки ҷангро хотима надиҳад, афзоиш хоҳад дод”.

Магомед Евлоев, намояндаи Тоҷикистон, дар мусобиқаи байналмилалии рейтингии гуштии озод “Ёдбуди Имре Пойяк ва Янош Варга”, ки рӯзи 17-уми июл дар шаҳри Будапешти Маҷористон баргузор шуд, медали нуқра ба даст овард.

Дар ин мусобиқаи рейтингӣ дар риштаҳои гуштии озод ва гуштии юнонию румӣ ба хотираи қаҳрамонҳои Бозиҳои олимпӣ, паҳлавонони Маҷористон Имре Пойяк ва Янош Варга ҳамасола дар Будапешт варзишгарон аз кишварҳои мухталифи ҷаҳон иштирок мекунанд.

Дар ин мусобиқаи анъанавӣ, ки дар риштаи гуштии озод миёни мардон аз рӯи 10 вазн сурат гирифт, Тоҷикистонро танҳо як нафар – Магомед Евлоев – намояндагӣ карда, ба гирифтани медали нуқра мушарраф шуд.

Евлоев дар вазни то 79 кило дар даври ҳаштякниҳоӣ муқобили Лукас Марко Каҳнт аз Олмон бо ҳисоби 4:1 дастболо гардида, дар чаҳорякфинал Чандермоҳан Чандермоҳанро аз Ҳиндустон (8:8) шикаст дод ва ба нимфинал баромад.

Вай дар даври ниманиҳоӣ бар Георгиос Кугиоумтсидис, собиқ қаҳрамони Аврупо аз Юнон, бо ҳисоби 2:0 пирӯз шуда, ба финал роҳ ёфт. Аммо Евлоев дар рақобати ниҳоӣ аз намояндаи Гурҷистон Владимир Гамкрелидзе бо ҳисоби 0:5 шикаст хӯрд. Паҳлавони гурҷӣ бо медали тилло ва Евлоев бо нишони нуқра сарфароз гаштанд.

Дар ин вазн паҳлавони эронӣ Фариборз Фаромарз Бобоёроғонӣ ва гуштигири юнонӣ Георгиос Кугиоумтсидис бо нишонҳои биринҷӣ мукофотонида шуданд.

Намояндаи дигари Тоҷикистон Абдулмаҷид Кудиев (65 кг) бо сабаби сари вақт нагирифтани раводид дар мусобиқаи Будапешт иштирок карда натавонист.

Ёдовар мешавем, варзишгарони тоҷик дар мусобиқаи байналмилалии гуштии озод ба хотираи паҳлавони машҳури турк Яшар Доғу, қаҳрамони Бозиҳои олимпӣ, ҷаҳон ва Аврупо, ки рӯзҳои 26-29-уми июни имсол дар шаҳри Коҷаэлии Туркия баргузор шуда буд, ду медали тилло ба даст оварданд.

Дар ин мусобиқаи анъанавии байналмилалӣ, ки миёни мардон аз рӯи 10 вазн сурат гирифт, варзишгарони беш аз 20 кишвар иштирок карданд.

Абдулмаҷид Кудиев дар вазни то 65 кило дар даври ниҳоӣ муқобили Ислом Ҳусейнов аз Беларус дастболо шуд. Намояндаи дигари Тоҷикистон Магомед Евлоев дар вазни то 79 кило дар даври ниҳоӣ бар Рамазон Сарӣ аз Туркия пирӯз гардид.

Абдулмаҷид Кудиеви 25-сола ва Магомед Евлоеви 26-сола, ки ҳарду зодаи Русия мебошанд, шаҳрвандии Тоҷикистонро пазируфтаанд ва аз ибтидои соли 2023 ба ҳайати дастаи мунтахаби кишвар дохиланд.

Бонки осиёии рушд (БОР) грантеро дар ҳаҷми 500 ҳазор доллар барои дастгирии ҳукумати Тоҷикистон дар навсозӣ ва рақамикунии низоми бимаи иҷтимоӣ ва таъминоти нафақа тақдим мекунад.

Ин маблағ барои омода кардани тарҳи ояндаи сармоягузорӣ ба пойдевори бимаи иҷтимоӣ ва таъминоти нафақа, эҷоди низоми иттилоотӣ дар бораи гирандагони нафақа дар назди Оҷонсии суғуртаву нафақаи иҷтимоии Тоҷикистон сарф хоҳад шуд.

Иҷрои ин тарҳ аз ҷониби БОР барои соли 2026 дар назар гирифта шудааст.

Шӯрои ҳуқуқи башари тобеи раиси ҷумҳури Русия қасд дорад, масъалаи ваксинзании муҳоҷиронеро, ки нияти кор дар қаламрави ин кишварро доранд, баррасӣ кунад. Дар ин бора Олга Демичова, як узви ин шӯро рӯзи 17-уми июл хабар додааст.

Ба гуфтаи ӯ, сабаби дар миён гузоштани ин масъала, хуруҷи бемории менингит аст, ки гӯиё муҳоҷирон ҳам ба Русия овардаанд. Менингит илтиҳоби пардаҳои муҳофизатии мағзи сар аст, ки дар сурати бемуолиҷа гузоштан то ба марг мерасонад.

Дафтари матбуоти Шӯрои ҳуқуқи башари Русия суханони Олга Демичоваро овардааст, ки гуфтааст: “Масъалаи амният ва пешгирӣ аз хуруҷи чунин беморӣ ба ваксинзании аҳолии Русия ва ваксинзании ҳатмии онҳое робита мегирад, ки мехоҳанд, дар қаламрави кишвари мо кор кунанд, то ки ин одамон сарчашмаи бемориҳои сироятӣ набошанд".

Чанде пеш Владимир Чуланов, сартабиби бемориҳои сироятӣ дар вазорати тандурустии Русия гуфтааст, ки аз аввали имсол то кунун дар Русия 1200 мавриди сирояти менингит сабт шудааст, ки назар ба соли гузашта ду баробар бештар аст.

Ба иддаои Чуланов, сабабгори хуруҷ муҳоҷирони корие ҳастанд, ки ба Русия меоянд. Хабари мазкур дар пасманзари авҷ гирифтани муҳоҷирситезӣ дар Русия дар расонаҳои ин кишвар нашр мешавад, ки ҳомиёни ҳуқуқ онҳоро ба бадномсозии муҳоҷирон муттаҳам мекунанд.

Дар садамаҳои нақлиётӣ дар Тоҷикистон дар муддати камтар аз ду рӯз 10 нафар ҷон бохта ва чаҳор тани дигар захм бардоштаанд.

Вазорати умури дохилӣ рӯзи 14-уми июл бо нашри як баёнияи расмӣ теъдоде аз садамаҳои нақлиётӣ бо оқибатҳои маргборро тасвир кардааст, ки рӯзҳои 12-ум ва 13-уми июл дар гӯшаҳои гуногуни кишвар сурат гирифтаанд.

Дар миёни қурбониён зоҳиран се узви як хонавода аз ноҳияи Вахш низ ҳастанд, ки дар натиҷаи садамаи моторолер ҷон додаанд. Дар баёния омадааст, фалокат рӯзи 12-уми июл дар ноҳияи Вахш ба вуқуъ пайвастааст.

Раҷабалӣ Саидалиев, ронандаи мотороллери "Муравей" ҳамроҳ бо 9 мусофире, ки дошт, ба чуқурӣ афтодаанд, ки дар натиҷа се мусофир, ки ғолибан хоҳаронанд, ҳалок шудаанд ва чаҳор нафари дигар чароҳат бардоштаанд.

Солона дар садамаҳои нақлиётӣ дар Тоҷикистон садҳо кас кушта ва маъюби якумрӣ мешаванд. Мошинҳои куҳнаву роҳҳои ноҳамвор, ҳаракат бо суръати баланд ва риоя накардани қоидаҳои ҳаракат аз сабабҳои маргумири зиёд дар роҳҳо номбар мегардад.

Танҳо дар соли гузашта дар Тоҷикистон 552 нафар ва ё рӯзона аз як то ду кас дар натиҷаи садамаҳои нақлиётӣ, ё дар ҷойи ҳодиса ва ё дар шифохона ҷон додаанд.

Бар асари оташсузӣ дар як маркази тиҷорӣ дар шаҳри Кут дар шарқи Ироқ, дастикам 69 нафар ҷон бохта, 11 тани дигар то ҳануз нопадид ҳастанд.

Дар ин бора хабаргузории "Рейтерз" бо такя ба мақомоти тандурустӣ ва интизомии шаҳри Кут, хабар додааст.

Дар видеоҳое, ки аз ин ҳодиса дар расонаҳои иҷтимоӣ нашр шуд, шуълаҳои калони азими оташ дар торикии шабона мушоҳида мешавад ва оташнишонҳо бо истифода мошинҳои обпош дар ҳоли хомуш кардани сухтор ҳастанд ва мардум низ ба кумаки онҳо шитофтаанд.

Алӣ Ал-Миёҳӣ аз мақомҳои шаҳри Кут ба "Рейтерз" гуфтааст, ки "ҷасадҳои бештаре ҳануз зери вайронаҳо мондаанд".

Сабаби ин оташсузӣ ҳанӯз маълум нест. Аммо тибқи таҳқиқоти ибтидоӣ, оташ аз табақае шуълавар шуд, ки дар он атр ва ашёи ороишӣ фурухта мешуд.

Шаҳрдори Кут гуфтааст, ки алайҳи соҳиби бино ва маркази харид, шикоят шудааст.

Дар соли 2023, беш аз 100 нафар пас аз оташсузӣ дар як толори арусӣ дар як шаҳри воқеъ дар шимоли Ироқ, ба ҳалокат расида буданд.

Афғонистон, Покистон ва Узбекистон созишномаи омӯзиши имкониятҳои бунёди хатти роҳи оҳанро имзо карданд. Ин тарҳ бунёди роҳи оҳан аз Узбекистон то Покистонро дар назар дорад.

Дар маросими имзои ин тавофуқнома, ки рузи 17-уми июл дар Кобул доир шуд, вазирони корҳои хориҷии ҳукумати Толибон, Покистон ва Узбекистон Амирхон Муттақӣ, Исҳоқ Дор ва Бахтиёр Саидов, иштирок доштанд.

Агар ин тарҳ анҷом шавад, Узбекистон аз роҳи Афғонистон ба Покистон пайваст мешавад ва кишварҳои Осиёи Марказӣ метавонанд ба бандарҳои баҳрии Покистон дастрасӣ пайдо кунанд.